ဘ၀

ပြီးခဲ့တဲအပတ်က senior အစ်မတစ်ယောက် ရုတ်တရက်ဆုံးတယ်လို့ သတင်းကြားတဲ့နေ့အသုဘပို့သွားခဲ့တယ်။
သူနဲ့မတွေ့တာ 10နှစ်ကျော်ခဲ့ပြီ။ ဒါပေမဲ့ ကိုယ်နဲ့အလုပ်အတူတွဲလုပ်ခဲ့သူမို့ နောက်ဆုံးနှုတ်ဆက်တဲ့အနေနဲ့ပေ့ါ။
သူလည်းကိုယ့်လို အပျိုကြီးမို့ အချင်းချင်းအားပေးတဲ့အနေလဲပါတာပေါ့။
ပြန်လာပြီးနောက်ပိုင်း လူဘ၀ကို အရင်ကထက် ပိုစဉ်းစားဖြစ်တယ်။
တကယ်တော့ ဘ၀ဆိုတာ အချိန်တွေကို ပေါင်းထားတာလေ။
တနေ့တနေ့ ကိုယ့်အချိ်န်တွေ ဘယ်လိုကုန်သွားသလဲလို့ ပြန်တွေးဖြစ်တယ်။
မနက်စောစောအိပ်ယာထ ရေချိုး ဘုရားရှစ်ခိုး သူများထည့်ပေးတဲ့ ထမင်းချိုင့်ဆွဲပြီး ရုံးကားမှီအောင်ပြေးရတယ်။
မနက်(7)နာရီမှာ အိမ်ကထွက်လာလိုက်တာ ည(7)နာရီမှ အိမ်ကိုပြန်ဝင်ဖြစ်တယ်။
အိမ်ရောက်တော့လည်း ညစာစား စကားနည်းနည်းပြောပြီးတာနဲ့ လူက အင်ဂျင်ကျနေပြီလေ။
ဒါဘ၀တဲ့လား။
အဲဒီလို မောင်းနှင်လာတာ 43နှစ်ရှိသွားပြီ။
ဒီအတိုင်းဆက်သွားမှလား။
ဒါဆိုရင်တော့ ရုတ်တရက်ဆုံးသွားတဲ့ senior အစ်မလိုဘဲ လောကထဲက ထွက်သွားရမယ်ထင်တယ်။
ရုပ်ပိုင်းလိုအင်တွေပြည့်စုံဘို့အတွက် စိတ်အင်အားတွေနဲ့အချိန်တွေအကုန်ခံပြီး
နောက်ဆုံး အဲဒီရုပ်ပိုင်းတွေကို ထားခဲ့ပြီးလောကထဲက ထွက်ခွာဘို့ဆိုတာကတော့
နည်းနည်းပြန်စဉ်းစားရလိမ့်မယ်ထင်ပါတယ်။
ကျွန်မအချိန်တွေကို ပြန်စီစဉ်ရတော့မယ်။

ချစ်ခင်တဲ့လူတွေကို အချိန်ပေးမယ်။

စိတ်ပိုင်းတည်ငြိမ်ဘို့အတွက် အချိန်ယူမယ်။

စာဖတ်ဘို့ စာရေးဘို့ အချိန်ယူမယ်။

တပတ်မှာ တစ်ရက်ပိတ်ပြီး ပိတ်တဲ့ရက်မှာလည်း လူမှု့ရေးတွေနဲ့အချိန်ကုန်နေရင်တော့
တော်တော်လေး ကြေကွဲရမယ်ထင်တယ်။

အချိန်က ရပ်မနေဘူးလေ။

ကျွန်မနယ်မှာတုန်းက အချိန်ကနှေးတယ်။
ရန်ကုန်ရောက်တော့ အချိန်က နည်းနည်းပိုမြန်လာတယ်။
စင်ကာပူမှာတော့ အိုး မြန်လိုက်တာ မနည်းသတိထားကြည့်ရတယ်။

နောက်တစ်ခုက အသက်ကြီးလာတော့ ပိုမြန်လာတယ်။

အမှန်တော့ အချိန်က ပိုမြန်တာမဟုတ်ပါဘူး။

ကျွန်မတို့စိတ်တွေက အချိန်ကို မခံစားနိုင်တော့လောက်အောင် ဖြစ်လာတာပါ။

စိတ်မှာ အတွင်းပိုင်း ခံစားမှုတွေ တည်ရှိမှုတွေပျောက်ကွယ်ပြီး
အပြင်ပိုင်း ခံစားမှုတွေက နေရာဝင်ယူလာတော့
ကိုယ့်ရဲ့အချိန်ပျောက်သွားတာပါ။

အခုတော့ ပျောက်နေတဲ့အချိန်ကို ပြန်ရှာဘို့

ကျွန်မကျိုးစားကြည့်တော့မယ်။